«Заң мен тәртіп» тұжырымдамасын іске асыру аясында Сарыарқа ауданының прокуратурасы аудан әкімдігі, Астана қаласының Төтенше жағдайлар департаменті және Полиция басқармасымен бірлесіп, шомылу маусымы кезеңіндегі қауіпсіздікті қамтамасыз етуге бағытталған профилактикалық іс-шара өткізді, — деп хабарлайды «Dalamedia» ақпараттық порталы.

Кездесу барысында тұрғындарға, әсіресе кәмелетке толмағандарға су айдындарындағы қауіпсіздік ережелері кеңінен түсіндірілді. Мамандар жаз мезгілінде жиі кездесетін жазатайым оқиғалардың алдын алу жолдары мен демалыс орындарындағы қоғамдық тәртіп талаптарына тоқталды.

Негізгі назар балалардың қауіпсіздігіне аударылып, ата-аналардың жазғы демалыс кезінде кәмелетке толмағандарға бақылауды күшейтуі қажет екені атап өтілді.

Сонымен қатар, қатысушыларға судағы қауіпсіздік талаптарын бұзған жағдайда қарастырылатын әкімшілік жауапкершілік шаралары және төтенше жағдай кезінде әрекет ету тәртібі түсіндірілді.

Мамандардың айтуынша, мұндай түсіндіру жұмыстары жазғы маусымда қайғылы жағдайлардың алдын алуға және қоғамдық қауіпсіздікті нығайтуға бағытталған.
Астана қаласының прокуратурасы төтенше жағдайлардың алдын алу, азаматтардың өмірі мен денсаулығын қорғау, сондай-ақ жазғы кезеңде халықтың қауіпсіздігі мен саулығын қамтамасыз етуге бағытталған іс-шараларды күшейтті.