Мемлекет басшысына Алтын Орда дәуірінің тарихи-мәдени мұрасын кеңінен таныстыратын ауқымды экспозиция ұсынылды. Көрме барысында Президентке 70 археологиялық және сәулеттік ескерткішті қамтитын интерактивті карта көрсетіліп, оның көмегімен ортағасырлық кезеңге қатысты маңызды тарихи нысандардың орналасуы мен зерттелу барысы жан-жақты түсіндірілді.

Көрменің негізгі бөлігі ретінде ерекше құндылыққа ие «Хандар шежіресі» атты қолжазба ұсынылды. Бұл жәдігерде Алтын Орда дәуіріндегі билеушілер мен тарихи тұлғалардың генеалогиялық деректері қамтылып, сол кезеңнің саяси құрылымы мен әулеттік байланыстарын тереңірек түсінуге мүмкіндік береді.

Сонымен қатар экспозицияда әлемдік тарихи маңызы бар Каталон атласы, әртүрлі жазба деректер, көне теңгелер мен тұрмыстық бұйымдар қойылған. Бұл артефактілер Алтын Орда кезеңіндегі сауда-саттық, мәдени байланыстар және күнделікті өмір туралы құнды ақпарат береді.

Жазба мұралар қатарында 3 жарлық, 4 дипломатиялық хат және 21 қолжазба түпнұсқа және электронды форматта көпшілік назарына ұсынылған. Аталған құжаттар ортағасырлық дипломатия мен мемлекеттік басқару жүйесінің даму деңгейін айқындайды.

Көрме барысында ұсынылған материалдар Алтын Орда мұрасының тарихи маңызын тереңірек зерттеуге және оны халықаралық деңгейде кеңінен насихаттауға бағытталған.