Қазақстанда банк қызметіне қатысты жаңа талаптар енгізіліп, клиенттерді биометриялық сәйкестендіру және шоттарға шектеу қою тәртібі күшейтілді, –деп хабарлайды «Dalamedia» ақпараттық порталы.

Қазақстан Ұлттық Банкі 2026 жылғы 10 сәуірдегі қаулыға сәйкес банк шоттарын ашу, жүргізу және жабу ережелеріне бірқатар өзгеріс енгізді. Енді қашықтан шот ашу кезінде клиенттің жеке басы міндетті түрде биометриялық тексеру арқылы расталады. Сонымен қатар банктер деректер алмасу орталығы арқылы тұлғаны сәйкестендіруге міндеттеледі.

Жаңа тәртіпте шоттардағы шығыс операцияларын тоқтату және қаражатқа бұғат қою тәртібі де нақты айқындалған. Мұндай шешімдер уәкілетті органдар мен заңды тұлғалардың қаулылары негізінде қабылданады. Бұл ретте қолданыстағы азаматтық, қылмыстық-процестік, салық және кедендік заңнама басшылыққа алынады.

Сондай-ақ банктерге сот орындаушылары мен әділет органдарымен ақпарат алмасу тәртібі күшейтілді. Тиісті қаулы түскен жағдайда қаржы ұйымдары клиенттің шоты туралы мәлімет беріп, қабылданған шараларды үш жұмыс күні ішінде хабарлауы тиіс.

Бұдан бөлек, қолма-қол емес төлемдерде биометриялық сәйкестендіруді қолдану талабы да күшейтіліп отыр. Ал цифрлық қаржы активтеріне, соның ішінде стейблкоиндерге қатысты жаңа қағидалар бекітілді. Енді мұндай активтер тек толық қамтамасыз етілген жағдайда ғана шығарылуы мүмкін.

Стейблкоин эмитенттері үшін де нақты талаптар белгіленген: жарғылық капиталы кемінде 200 млн теңге болатын компаниялар ғана нарыққа шыға алады. Әрбір шығарылым арнайы цифрлық платформада тіркеліп, толық тексеруден өтеді.

Жаңа ережелерге сәйкес кейбір қаржы құралдары тек білікті инвесторларға қолжетімді болады. Ол үшін кемінде 10 сұрақтан тұратын тест тапсырып, 80 пайыз нәтижеге жету қажет. Қаулы 2026 жылғы 1 мамырдан бастап күшіне енеді.