Алматыда балаларды қорғау халықаралық күні қарсаңында «Тау Жүрек: Биік мәдениет» атты ауқымды әлеуметтік жоба іске қосылмақ. Жоба аясында 100 мың қазақстандыққа таудағы қауіпсіздік ережелері, экологиялық мәдениет пен тау этикасы тегін оқытылады,-деп хабарлайды «Dalamedia» ақпараттық порталы.

Ұйымдастырушылардың айтуынша, бастама Президенттің «Таза Қазақстан» экологиялық акциясын қолдауға бағытталған. Негізгі мақсат – экологиялық білімді кеңейтіп, тауға шығатын азаматтардың қауіпсіздік деңгейін арттыру.

Жобаның авторы – Қазақстан альпинизм және спорттық құзға өрмелеу федерациясының президенті Нұрсұлтан Шоқанов. Оның айтуынша, Алматы тау кластерінің дамуы туристер санын арттырып отыр, соған сай қауіпсіздік мәдениетін күшейту қажеттілігі туындаған.

Мамандардың дерегінше, таудағы оқыс оқиғалар соңғы уақытта шамамен 30 пайызға көбейген. Көбіне 14 пен 23 жас аралығындағы дайындықсыз жастар зардап шегеді. Ал 2025 жылдың өзінде құтқарушылар тауда 69 рет шұғыл көмек көрсетуге мәжбүр болған.

«Тау Жүрек» жобасы жаппай туризм мәдениетін өзгертіп, оны саналы әрі қауіпсіз бағытқа бұруды көздейді. Бағдарламаға балалар үйінің тәрбиеленушілері, мектеп оқушылары, студенттер, блогерлер, журналистер мен түрлі сала өкілдері қатысады.

Алғашқы іс-шара «Солнышко» балалар үйінің тәрбиеленушілерінен басталмақ. 28 мамыр күні 50 бала тауға танымдық жорыққа шығады. Оларға педагогтар, кәсіби гидтер, дәрігерлер және құтқару қызметінің мамандары еріп барады.

Жоба аясында 30 мамыр күні Медеу мен Шымбұлақ аумағында арнайы бағдарлама өтеді. Қатысушылар аспалы жолмен көтеріліп, Қаза тапқан альпинистер мемориалына барады. Одан кейін қауіпсіздік, табиғатты қорғау және тау ережелері бойынша дәріс өткізіледі.

Бағдарлама барысында қатысушылар Тұйық-Су альплагеріне түсіп, практикалық сабақтарға қатысады. Онда альпинистік түйін байлау, жабдықпен жұмыс істеу және шатыр тігу дағдылары үйретіледі. Күн соңында «Медеуге» оралып, БАҚ өкілдеріне арналған ашық кездесу өтеді.

Ұйымдастырушылардың айтуынша, бұл жоба «Таза Қазақстан» бастамасының тек тазалық емес, экологиялық мәдениет пен жауапкершілікті қалыптастыруға бағытталғанын көрсетеді.