Шри-Ланка билігі Қазақстан азаматтары үшін елге кіру визасының алымын алып тастау мүмкіндігін қарастырып жатыр. Жоспар іске асса, туристерге 30 күнге дейін тегін виза берілуі ықтимал. Алайда бұл жүйенің нақты қашан енгізілетіні әзірге белгісіз, — деп хабарлайды «Dalamedia» ақпараттық порталы.

Бұл ақпарат Шри-Ланка парламентінің 2026 жылғы 7 мамырда иммиграция және эмиграция туралы заңға өзгерістер енгізгеннен кейін белгілі болды. Жаңа ережелер аясында Қазақстанды қоса алғанда 40 елдің азаматтарына виза алымын уақытша алып тастау қарастырылып отыр.

БАҚ деректеріне сүйенсек, мұндай қадамның негізгі мақсаты — туризмді дамыту. Виза құнын алып тастау арқылы елге қосымша шамамен 247 мың турист тартылып, олардың шығыны есебінен экономикаға 300 миллион доллардан астам кіріс түсуі мүмкін деген болжам бар.

Жобаға сәйкес, туристерге бір жыл ішінде 30 күнге дейін тегін кіру мүмкіндігі берілуі ықтимал. Дегенмен қазіргі уақытта бұрынғы тәртіп сақталып отыр: елге кіру үшін ETA электронды рұқсатын ақылы түрде рәсімдеу қажет.

Тегін виза енгізілуі мүмкін елдер қатарында Қазақстан, Ресей, Қытай, Үндістан, Ұлыбритания, АҚШ, Германия, Франция, Оңтүстік Корея, БАӘ және басқа да мемлекеттер бар. Бұған дейін мұндай жеңілдік тек жеті елдің азаматтарына ғана қолданылған.

Сонымен қатар, бұл толық визасыз режим емес екені атап өтіледі. Жаңа жүйе күшіне енсе де, ETA рәсімдеу талабы сақталады, өзгеріс тек виза алымына қатысты болмақ.

Шри-Ланка қоғамдық қауіпсіздік және парламенттік істер министрі Ананда Виджепала бұл жүйе қауіпсіздік мақсатында сақталатынын айтқан. Яғни елге кіру тәртібі жеңілдегенімен, бақылау жүйесі өз күшінде қалады.

Ал Шри-Ланканың Ресейдегі елшілігі қазіргі таңда жаңа тәртіптің іске қосылмағанын мәлімдеп, визалық рәсімдеу бұрынғыдай ақылы түрде жүргізіліп жатқанын нақтылаған.