Алматы сейсмикалық қауіпті аймақта орналасқандықтан, қаладағы төтенше жағдайларға дайындық мәселесі әрдайым өзекті. Құзырлы органдар мегаполистің жер сілкінісіне дайындығы туралы түсініктеме беріп, қауіпсіздік тек арнайы қызметтердің жұмысына ғана емес, тұрғындардың өзіне де байланысты екенін айтты, ,-деп хабарлайды «Dalamedia» ақпараттық порталы.

Мамандардың мәліметінше, төтенше жағдай кезіндегі ең үлкен қауіптің бірі – адамдардың өз қателігі. Жер сілкінісі немесе өрт кезінде кей тұрғындар лифтке мінуге тырысады, құжат не бағалы заттарын алу үшін қайтадан үйге кіреді немесе қауіпсіз жерге шығудың орнына телефонға видео түсіруге кіріседі. Мұндай әрекеттер салдарды ауырлатуы мүмкін.

Төтенше жағдайлар қызметі қауіпсіздік мәдениеті тек теориялық біліммен шектелмеуі керегін ескертті. Әр адам үйіндегі қауіпсіз орындарды алдын ала анықтап, эвакуация жолдарын біліп, байланыс үзілген жағдайда отбасы мүшелерімен әрекет ету тәртібін келісіп қоюы қажет. Сондай-ақ «дабыл сөмкесін» дайындап, ауыр шкаф, люстра және тұрмыстық техникаларды қабырғаға бекітіп қойған жөн.

Қалада халықты оқыту жұмыстары тұрақты жүргізіліп келеді. Мектеп оқушыларына, студенттерге, мұғалімдерге, сауда орталықтарының қызметкерлеріне және тұрғындарға арналған арнайы курстар, ашық сабақтар, практикалық жаттығулар мен шеберлік сағаттары ұйымдастырылады. Қоғамдық орындарда эвакуация тәртібі де түсіндіріледі.

Мамандардың айтуынша, Алматыда арнайы мобильді құрал арқылы тұрғындарға әртүрлі деңгейдегі жер сілкінісін қауіпсіз жағдайда сезіну мүмкіндігі беріледі. Бұл тәжірибе адамдарға нақты әрекет ету алгоритмін меңгеруге көмектеседі. Биылдың өзінде Азаматтық қорғау саласындағы халықты оқыту орталығында 900-ден астам адам арнайы дайындықтан өткен.

Қалада жедел ескерту жүйесі де толық жұмыс істейді. Қазір Алматы бойынша 843 сирена орнатылған. Бұдан бөлек, 695 телеарна мен 25 радиоарна арқылы хабар таратуға мүмкіндік бар. Сонымен қатар тұрғындарға Cell Broadcast технологиясы арқылы ұялы телефонға жаппай ескерту хабарламалары жіберіледі.

Жойқын жер сілкінісі болған жағдайда тұрғындарды уақытша орналастыру үшін мектептер, университеттер мен стадиондар базасында 384 қабылдау пункті дайындалған. Бұл нысандарда халықты тіркеу, азық-түлік пен ауызсу тарату, қажет болса қауіпсіз аймақтарға көшіру жұмыстары жүргізіледі. Барлық пункт 2GIS жүйесіне енгізілген және интернетсіз режимде де қолжетімді.

Құзырлы орган өкілдері қауіпсіздік тек мемлекеттің міндеті емес екенін еске салды. Олардың сөзінше, төтенше жағдай кезінде ең маңыздысы – не істеу керегін білетін, сабыр сақтай алатын дайын адам. Сондықтан Алматы үшін қауіпсіздік мәдениетін қалыптастыру мен тәжірибелік дайындықты күшейту аса маңызды бағыт болып қала береді.