Қазақстанда жасанды интеллектінің қарқынды дамуы бірқатар мамандық иелерінің болашағына алаңдаушылық туғызып отыр. Сарапшылардың айтуынша, алдағы жылдары кей қызмет түрлері толық немесе жартылай автоматтандырылып, шамамен 400 мың адам жұмысынан айырылуы мүмкін, — деп хабарлайды «Dalamedia» ақпараттық порталы.

Қазірдің өзінде жасанды интеллект байланыс орталықтарының операторлары, аудармашылар, бухгалтерлер және заңгерлер атқаратын жұмыстың бір бөлігін алмастыра бастаған. Бұл өзгеріс еңбек нарығына айтарлықтай әсер етіп жатыр.

Бес жылдан бері заң саласында еңбек етіп келе жатқан заңгер Ғабит Өмірбековтің айтуынша, технология қанша дамығанымен, адам факторын толық ығыстыра алмайды. Оның сөзінше, заң саласында тек баптарды жатқа білу аздық етеді.

«Жасанды интеллект кәсіби заңгердің орнын толық баса алмайды. Бұл салада келіссөз жүргізу, адамды сендіру, шешендік қабілет пен икемділік қажет», – дейді Ғабит Өмірбеков.

Соған қарамастан, ол соңғы уақытта клиенттердің кей сұрақтарға жауапты жасанды интеллект арқылы іздей бастағанын жасырмайды.

Сарапшылардың пікірінше, алдағы уақытта HR мамандары, кассирлер, даяшылар, жүргізушілер мен call-орталық қызметкерлері де тәуекел аймағында қалуы мүмкін.

Ал бизнес өкілдері бұл үрдісті шығынды азайтудың тиімді жолы деп бағалап отыр. Умид Османов басқаратын компания бір жыл ішінде қызметкерлер санын екі есеге қысқартқан.

Оның айтуынша, бұрын 25 адам істеген жұмысты қазір 10 қызметкер мен жасанды интеллект бірігіп атқарады.

«Орташа жалақыны есептегенде ай сайын қомақты қаржы үнемделеді. Оның үстіне жасанды интеллект демалыс сұрамайды, ауырмайды», – дейді ол.

Алайда HR мамандары мұндай өзгерістің кері әсері болуы мүмкін екенін ескертеді. Сарапшы Сабина Тайпова көптеген компания боттарға толық сенім артқаннан кейін қайтадан мамандар іздей бастағанын айтады.

Оның сөзінше, автоматтандырылған қызмет көрсету кезінде адамдар толыққанды кері байланыс ала алмайды. Бұл клиенттердің наразылығын күшейтіп, экономикалық тұрақсыздыққа да әсер етуі ықтимал.

Ал Еңбек және халықты әлеуметтік қорғау министрлігі еңбек нарығындағы өзгеріске бейімделу үшін қайта даярлау жұмыстары күшейтілгенін мәлімдеді. Ведомство мәліметінше, биылдың өзінде 186 мың адам жаңа мамандықтарға оқытылған.

Еңбек және әлеуметтік қорғау министрінің бірінші орынбасары Ербол Тұяқбаев Астанада жұмыс істеп тұрған JOLTAP жобасы арқылы азаматтар екі апта ішінде жаңа кәсіп меңгеріп, жұмысқа орналасуға мүмкіндік алып отырғанын айтты.

Мамандар азаматтарға еңбек құқықтарын да естен шығармауға кеңес береді. Егер қызметкердің орнына себепсіз автоматтандырылған жүйе енгізілсе, еңбек инспекциясына жүгінуге болады.