АҚШ Қорғаныс министрлігі қызметкерлерінің жұмысына жасанды интеллектіні енгізе бастады. Енді ведомство қызметінде Google компаниясының Gemini платформасына негізделген арнайы ЖИ-агенттер пайдаланылмақ,-деп хабарлайды «Dalamedia» ақпараттық порталы.

Engadget басылымының мәліметінше, жаңа жүйе үш миллионнан астам әскери және азаматтық қызметкерге арналған. Алғашқы кезеңде бұл құралдар министрліктің ашық ішкі желілерінде қолданылады. Сонымен қатар болашақта жүйені құпия ақпаратпен жұмыс істейтін желілерге де енгізу мүмкіндігіде қарастырылуда.

Жоба аясында алдын ала дайындалған сегіз ЖИ-агент іске қосылады. Олар күнделікті жұмысты жеңілдетуге бағытталған. Мәселен, жиналыс қорытындылары бойынша қысқаша есеп дайындау, бюджет құжаттарын құрастыру және ұсынылған шешімдердің ұлттық қауіпсіздік стратегиясына сәйкестігін талдау сияқты міндеттерді орындай алады.

Google компаниясының вице-президенті Джим Келлидің айтуынша, Пентагон қызметкерлері қарапайым мәтіндік сипаттама жазу арқылы өздеріне қажет жеке ЖИ-агенттерді де құрастыра алады.

АҚШ Қорғаныс министрлігінің дерегіне сүйенсек, Gemini негізіндегі чат-бот ведомствоның ішкі порталында өткен жылдың желтоқсанынан бері қолданылып келеді. Осы уақыт ішінде оны шамамен 1,2 миллион қызметкер пайдаланып, жүйеге 40 миллионға жуық сұраныс жіберген. Сондай-ақ төрт миллионнан астам құжат жүктелген.

Дегенмен мамандарды оқыту, технологияның енгізілуінен баяу жүріп жатыр. Желтоқсаннан бері жасанды интеллектпен жұмыс істеу курстарынан шамамен 26 мың қызметкер ғана өткен. Ал алдағы оқу бағдарламаларына орындар толық толып қойған.