Қазақстанның Сыртқы істер министрлігі қауіпсіздік пен эпидемиологиялық жағдайға байланысты азаматтарға Иран және Африкадағы бірқатар елдерге сапар шегуден бас тартуға кеңес берді. Бұл туралы Сенат кулуарында Сыртқы істер министрінің бірінші орынбасары Ержан Ашықбаев мәлімдеді, — деп хабарлайды «Dalamedia» ақпараттық порталы.

Оның айтуынша, қазіргі таңда кейбір мемлекеттерде қауіпсіздік деңгейі төмен, саяси тұрақсыздық байқалады, сондай-ақ эпидемиологиялық ахуал күрделі болып отыр.

«Африка елдерінде эпидемиологиялық жағдай күрделі. Ал Таяу Шығыстағы ахуал баршаға белгілі. Сондықтан Иранға және Африканың бірқатар мемлекеттеріне барудан бас тартуға қатаң түрде кеңес береміз», – деді ол.

Сыртқы істер министрлігі өкілдері шетелге шыққан әрбір азамат барған елдің заңдарын сақтауға міндетті екенін де еске салды.

«Қазақстан азаматтары қай мемлекетке барса да, сол елдің заң талаптарын орындауы тиіс. Бұл – міндет», – деді Ержан Ашықбаев.

Айта кетейік, наурыз айында Сыртқы істер министрлігі Таяу Шығыстағы тұрақсыз жағдайға байланысты бірқатар елге барудан бас тартуға кеңес берген болатын. Аталған тізімге Бахрейн, Мысыр, Израиль, Иордания, Ирак, Иран, Катар, Кувейт, Ливан, Біріккен Араб Әмірліктері, Оман, Сауд Арабиясы, Сирия және Йемен кірген.

Кейін, 27 наурызда Мысыр бұл тізімнен шығарылды. Ведомство бұл шешімді елдегі жағдайдың тұрақтануымен және әуежайлар мен туристік аймақтардың қалыпты жұмыс істеуімен түсіндірді. Ал 24 мамырда Үндістанның Денсаулық сақтау министрлігі де бірқатар африкалық елдерге, атап айтқанда Конго Демократиялық Республикасы, Уганда және Оңтүстік Суданға бармауға кеңес берді. Себебі бұл өңірлерде Эбола қызбасының таралу қаупі жоғары.

Бұған дейін Сыртқы істер министрлігі сапар жоспарлағанда қауіпсіз әрі тұрақты бағыттарды таңдауға шақырған болатын. Қазіргі таңда туристер үшін салыстырмалы түрде қолайлы бағыттар ретінде Таиланд, Вьетнам және Камбоджа аталып отыр.