Kaspi.kz компаниясы Kaspi Travel арқылы турпакет немесе барып-қайту әуе билетін сатып алып, қазір Таяу Шығыс елдерінде жүрген немесе сол өңірде транзиттік жолаушы ретінде қалып қойған клиенттерге материалдық көмек көрсету туралы шешім қабылдады, – деп хабарлайды «Dalamedia» ақпараттық порталы.

Компания мәліметінше, аталған өңірде мәжбүрлі түрде жүрген кезеңде клиенттердің Kaspi Gold картасына күн сайын қаржылай қолдау аударылады. Төлем мөлшері әр ересек адамға тәулігіне 35 мың теңге, ал әр балаға 15 мың теңге көлемінде белгіленген.

Kaspi.kz қазіргі жағдайда өз клиенттерімен тұрақты байланыс орнатып, оларға жан-жақты қолдау көрсету үшін барлық қажетті шараны қабылдап отыр. Компания бұл көмектің жол жүруі уақытша шектелген азаматтарға күнделікті қажеттіліктерін өтеуге бағытталғанын атап өтті.

Сондай-ақ Kaspi.kz шетелде жүрген қазақстандықтарды қауіпсіз жерлерде болуға, Қазақстан Республикасының елшіліктері мен консулдықтарымен үнемі байланыста ұстауға шақырды. Компания тарапынан қолдау алдағы уақытта да жалғасатыны хабарланды.