Air Astana әуе компаниясы Таяу Шығысқа бағытталған рейстердің уақытша тоқтатылуына байланысты үйіне орала алмай қалған қазақстандық жолаушыларға қолдау көрсетіп жатқанын хабарлады, – деп хабарлайды «Dalamedia» ақпараттық порталы.Компания жағдай форс-мажор сипатта болғанымен, жолаушыларға барынша қолдау көрсету үшін бірқатар шара қабылдаған.

Қазір Дохада 174, Делиде 231, Дубайда 330 жолаушы тегін қонақүйде орналастырылған. Бір тәулікке тегін тұру ұйымдастырылып, әрі қарайғы орналастыру мәселесі бойынша арнайы тарифтер мен келісімдер қарастырылған. Бұл шаралар жолаушылардың қауіпсіздігін қамтамасыз етуге және олардың күнделікті қажеттіліктерін өтеуге бағытталған.

Air Astana жолаушыларға құқықтық көмек алу немесе елге қайтару (репатриация) мәселелерін шешу үшін Қазақстанның шетелдегі дипломатиялық мекемелерімен байланысуға кеңес береді. Компания сондай-ақ клиенттерімен тұрақты байланыс орнатып, жағдайды үнемі бақылауда ұстап отыр.

Айта кетейік, бұған дейін Ирандағы жағдайдың ушығуына байланысты елімізден Таяу Шығысқа баратын рейстер уақытша тоқтатылған болатын. Бір күн бұрын Сыртқы істер министрлігі қазақстандықтарға жағдай тұрақтанғанша Иранға барудан уақытша бас тартуды ұсынған.