Қазақстанда шетел азаматтарына көші-қон саласындағы бірқатар қызметті онлайн форматта рәсімдеуге мүмкіндік беретін QazETA мобильді қосымшасы әзірленіп жатыр. Бұл туралы Ішкі істер министрі Ержан Сәденов мәлімдеді ,-деп хабарлайды «Dalamedia» ақпараттық порталы.

Министрдің айтуынша, жаңа қосымша арқылы шетел азаматтары смартфонның көмегімен жеке сәйкестендіру нөмірін (ЖСН) ала алады. Қазіргі уақытта осыған қатысты заңнамалық түзетулер Сенаттың қарауында.

Сонымен бірге Ержан Сәденов халықаралық әуежайлар мен ірі шекаралық өткізу бекеттерінде шетелдік қонақтарға арналған QR-коды бар туристік карталар таратылып жатқанын да атап өтті. Бұл карталарда Қазақстанда болу ережелері, төтенше жағдай қызметтерінің байланыстары және ұялы байланыс операторлары туралы мәліметтер көрсетілген.

Айта кетейік, бұған дейін елде медициналық қызметке қатысты түбіртектерде азаматтардың ЖСН-і көрсетілетіні хабарланған болатын.