АҚШ-тың президенті Дональд Трамп Ормуз бұғазында кемелерді шығару операциясы басталатынын мәлімдеді, — деп хабарлайды «Dalamedia» ақпараттық порталы.

Ол әлеуметтік желідегі жазбасында АҚШ дүйсенбі күні Таяу Шығыс уақыты бойынша таңертең Ормуз бұғазынан кемелерді қауіпсіз шығару процесін бастайтынын айтқан. Дегенмен бұл ақпарат ресми түрде расталған жоқ.

Трамптың сөзінше, “әлемнің көптеген елдері” Вашингтоннан Ормуз бұғазында АҚШ пен Иран арасындағы шиеленіс салдарынан тоқтап қалған кемелерді өткізуге көмек сұраған.

“Иранның, Таяу Шығыстың және АҚШ-тың игілігі үшін біз бұл елдерге кемелерін осы шектеулі су жолдарынан қауіпсіз алып өтетінімізді айттық. Осылайша олар өз істерін еркін жалғастыра алады. Бұл процесс ‘Project Freedom’ деп аталады және дүйсенбі күні таңертең басталады”, – деп жазды Трамп.

Сонымен қатар ол операцияға кедергі жасалған жағдайда АҚШ күш қолданатынын да ескерткен.

АҚШ Қарулы күштерінің Орталық қолбасшылығының (CENTCOM) мәліметінше, Ормуз бұғазы арқылы кемелердің қауіпсіз қозғалысын қамтамасыз етуге бағытталған операцияға эсминецтер, әскери ұшақтар және шамамен 15 мың әскери қызметкер тартылуы мүмкін.

Бұған дейін Трамп Иранның мұнай инфрақұрылымына соққы жасау мәселесін көтеріп, үш күндік уақыт шегін айтқан еді. БАҚ деректерінде оның жаһандық қауіпсіздікке әсер ететін “жою таймері” туралы да мәлімдеме жасағаны жазылған.

“Иранның мұнай инфрақұрылымы жарылуына шамамен 3 күн қалды. Бұл соғыс жақын арада аяқталады және біз үлкен жеңіске жетеміз”, – деген оның сөзі келтірілді.

Haberler басылымы бұл мәлімдемелер АҚШ-тың Иранның стратегиялық мұнай нысандарына ауқымды әскери операцияға дайындалып жатқанын меңзеп, Таяу Шығыстағы жағдайды одан әрі ушықтырғанын жазған.