Иран жұма күні Израиль мен Ливан арасындағы уақытша бітім аясында стратегиялық маңызы зор Ормуз бұғазын коммерциялық кемелер үшін қайта ашқанын мәлімдеді, –деп хабарлайды «Dalamedia» ақпараттық порталы.

Маңызды теңіз жолының қайта іске қосылуы Вашингтон мен Тегеран арасында алдағы күндері өтуі мүмкін келіссөздерге үмітті арттырды. Сарапшылар бұл қадам соғысты тоқтату жөніндегі келісімге жақындауға ықпал етуі мүмкін екенін айтады.

АҚШ президенті Дональд Трамп та келіссөздердің оң бағытта жүріп жатқанын айтып, Иранмен елеулі қайшылықтар көп емес екенін жеткізді. Оның сөзінше, тараптар жақын күндері келісімге келуі ықтимал.

Сонымен қатар Трамп Ормуз бұғазы ашық болғанымен, АҚШ-тың Иран порттарына қатысты әскери-теңіз блокадасы толық келісім жасалғанға дейін күшінде қалатынын атап өтті. Ол бұл процесс ұзаққа созылмайтынын, көптеген мәселе алдын ала келісілгенін айтты.

Алайда Иран билігінде бұл мәселеге қатысты пікір біркелкі емес. Парламент спикері Мохаммад Багер Галибаф АҚШ қысымы жағдайында бұғаздың толық еркін жұмыс істеуі екіталай екенін мәлімдеді.

Иран сыртқы істер министрі Аббас Аракчи болса, бұғаз уақытша бітімге сәйкес толық ашылғанын және жағдайдың келісілген бағытта дамып жатқанын жеткізді.

Трамп бұған дейін Иран ядролық қарудан бас тартуға дайын екенін де айтқан. Оның мәлімдеуінше, АҚШ Ирандағы байытылған уран қорын өз бақылауына алуды көздеп отыр.

Қазір тараптар арасындағы келіссөздер жалғасуда. Ақ үйдің мәліметінше, негізгі кездесу демалыс күндері өтуі мүмкін.