Мемлекет басшысының Жарлығымен Ержан Нұрланұлы Жиенбаев Қазақстан Республикасы Президенті Әкімшілігі Басшысының орынбасары қызметіне тағайындалды. Осыған дейін атқарған лауазымынан босатылды, деп хабарлайды «Dalamedia» ақпараттық порталы.

Ержан Нұрланұлы Жиенбаев 1979 жылы Алматы қаласында дүниеге келген. 2002 жылы «Тұран» университетін заңгер мамандығы бойынша тәмамдап, кейін 2018 жылы Ресей халық шаруашылығы және мемлекеттік қызмет академиясында (РАНХиГС) Executive MBA бағдарламасы бойынша білім алған. Құқық және мемлекеттік басқару салаларындағы кәсіби біліктілігін ұдайы жетілдіріп келеді.

Еңбек жолын 2002 жылы Қазақстан Республикасы Қаржы министрлігі жүйесінде бастап, 2005 жылға дейін осы салада қызмет атқарды. Кейін ҚР Премьер-Министрі Кеңсесінің құрылымында түрлі лауазымдарда жұмыс істеп, аға сарапшыдан Заң бөлімінің меңгерушісіне дейінгі еңбек жолынан өтті. Бұл кезеңде заңнамалық қамтамасыз ету және мемлекеттік басқару мәселелерімен айналысты.

2019 жылы ҚР Премьер-Министрі Кеңсесі басшысының орынбасары болып тағайындалды. Сол жылдың қазан айынан 2023 жылдың қыркүйегіне дейін Қазақстан Республикасы Президенті Әкімшілігі басшысының орынбасары қызметін атқарды. 2023 жылғы 1 қыркүйекте Мемлекет басшысының Жарлығымен Қазақстан Республикасы Президентінің құқықтық мәселелер жөніндегі көмекшісі болып тағайындалды.

Ержан Жиенбаев мемлекеттік қызметтегі жемісті еңбегі үшін бірқатар мемлекеттік наградалармен марапатталған. Атап айтқанда, «Құрмет» және «Парасат» ордендерінің иегері. Сонымен қатар Қазақстан Республикасы Президентінің Алғыс хаты мен Құрмет грамотасына ие болған. Сондай-ақ бірнеше мерейтойлық медальмен наградталған.