Президент Әкімшілігінің басшысы Айбек Дәдебай қызметінен босатылды, -деп хабарлайды «Dalamedia» ақпараттық порталы.

Ақорданың баспасөз қызметінің мәліметінше, Мемлекет басшысының Жарлығымен Айбек Арқабайұлы Дәдебай басқа жұмысқа ауысуына байланысты Қазақстан Республикасы Президенті Әкімшілігінің басшысы лауазымынан босатылған.

Айта кетейік, Айбек Дәдебай бұл қызметке 2024 жылдың ақпан айында тағайындалған болатын. Ол Абылай хан атындағы Қазақ халықаралық қатынастар және әлем тілдері университетін тәмамдап, осы оқу орнында магистратураны аяқтаған. Мамандығы – аймақтану магистрі.

Еңбек жолында жоғары оқу орнында оқытушы болып қызмет атқарған. Кейін Парламент Сенаты аппаратында, халықаралық ынтымақтастық саласында, сондай-ақ Сенат төрағасының көмекшісі ретінде жұмыс істеген.

Бұдан бөлек, Қазақстанның БҰҰ жанындағы Женевадағы тұрақты өкілдігінде дипломатиялық қызметте болды. Әр жылдары Президент Кеңсесі бастығының орынбасары, Президент Іс басқарушысының орынбасары және Іс басқарушысы қызметтерін атқарған.

Айбек Дәдебай II сыныпты кеңесші дипломатиялық дәрежеге ие. Ол «Құрмет» орденімен және «Ерен еңбегі үшін» медалімен марапатталған.