«Қазақстанның авиациялық әкімшілігі» АҚ бас атқарушы директоры қызметіне америкалық маман Майкл Дэниел тағайындалды, ,-деп хабарлайды «Dalamedia» ақпараттық порталы. Жаңа басшы өз қызметіне 4 мамырдан бастап кірісті.

Ресми мәліметке сәйкес, Майкл Дэниел азаматтық авиация саласында 40 жылдан астам тәжірибесі бар. Ол АҚШ-тағы Эмбри-Риддл аэроғарыш университетінде аэронавтика мамандығын тәмамдаған.

Еңбек жолын Американың Азаматтық авиация жөніндегі федералдық басқармасында бастаған маман бұл салада түрлі жауапты қызметтер атқарды. Атап айтқанда, ұшуды пайдалану инспекторы, әуе кемелерін сертификаттау жөніндегі маман және ұшу қауіпсіздігі қызметінің басшысы болған.

Сондай-ақ ол Франкфурт, Нью-Йорк және Вашингтон қалаларындағы кеңселерде жұмыс істеп, 2006-2009 жылдары Сингапур мен Бейжіңдегі бөлімшелерге жетекшілік еткен. Осы кезеңде халықаралық қауіпсіздік талаптарын бағалау және шетелдік жөндеу ұйымдарының жұмысын бақылаумен айналысқан.

Майкл Дэниел әр жылдары әуе қатынасы мен көлік қауіпсіздігіне қатысты халықаралық жобаларға қатысып, Халықаралық азаматтық авиация ұйымымен бірлесіп жұмыс істеген.

Жаңа басшының алдына қойылған негізгі міндеттердің бірі – Қазақстан мен АҚШ арасындағы тікелей әуе рейстерін ашу.