1 мамырдан бастап елде не өзгереді

Мамыр айынан бастап Қазақстанда бірқатар маңызды өзгерістер күшіне енеді. Алдымен мобильді аударымдарға бақылау күшейіп, салық органдары күмәнді операцияларды тексере бастайды, — деп хабарлайды «Dalamedia» ақпараттық порталы.

Банктер 15 сәуірге дейін қажетті мәліметтерді тапсырып үлгерген. Енді салық қызметі оларды саралап жатыр. Егер шотыңызға үш ай қатарынан 100-ден астам адамнан ақша түсіп, жалпы сомасы 1 миллион теңгеден асса, сізге хабарлама келуі мүмкін. Оны 30 күн ішінде орындау қажет. Ал қарапайым аударымдар үшін алаңдауға негіз жоқ.

Мамырда зейнетақы жүйесін жаңарту мәселесі де күн тәртібінде тұр. Үкімет жанындағы жұмыс тобы ай соңына дейін ұсынылған бірнеше модельдің бірін таңдауы тиіс. Соның бірі — «4+1» жүйесі. Мұнда жұмыс беруші аударатын 5 пайыздың 4 пайызы қызметкердің жеке шотына, 1 пайызы ортақ қорға бағытталады. Тағы бір нұсқада зейнетке шығу жасы емес, еңбек өтілі негізгі өлшем болмақ. Ал үшінші модельде азаматтар жинағын сақтандыру жүйесіне өткізіп, өмір бойы тұрақты төлем алуға мүмкіндік қарастырылған.

Цифрлық активтер мен шетелдік қаржы операцияларына да талап күшейеді. Ұлттық банк офшорлық аймақтардың жаңартылған тізімін бекітті. Енді осы елдермен байланысты қаржылық операциялар ерекше бақылауға алынады. Сонымен қатар криптовалюта нарығы да қатаң реттеледі. Бұл салада жұмыс істейтін барлық ұйымдар лицензия алуға міндетті болады, ал операциялар ашық жүргізіледі.

2 мамырдан бастап концерттерде фонограмма қолданылса, бұл туралы көрермен алдын ала ескертілуі тиіс. Ақпарат афишаларда, билет сату орындарында және жарнамада көрсетіледі.

4 мамырдан бастап келісімшартпен әскери қызметке кіретіндерге де талап өзгереді. Егер олардың табыс әкелетін мүлкі болса, оны бір ай ішінде сенімгерлік басқаруға өткізуі қажет. Ал ақша, акция немесе жалға берілген мүлік бұл талапқа кірмейді. Сонымен қатар мамыр мен қазан аралығында елде әскери жиындар өтіп, шамамен 3 мың азамат шақырылады.

Мамырда балық аулауға да шектеу енгізіледі. Уылдырық шашу кезеңіне байланысты еліміздің негізгі су айдындарында тыйымдар күшейеді. Белгіленген мерзімдер мен талаптарды сақтамағандарға айыппұл қарастырылған.

Автокөлік нарығында да өзгеріс бар. Ресей мен Беларусьтен әкелінетін көліктерге утильалым өседі. Ал Қазақстанда өндірілген немесе басқа елдерден келетін көліктер үшін шарттар өзгермейді.

Кедендік төлемдер жүйесі де жаңарады. 4 мамырдан бастап «KEDEN» жүйесі енгізіліп, төлемдер жаңа код арқылы жүргізіледі. Бұрынғы кодпен төленген қаражатты қайтарып алуға мүмкіндік бар.

Энергетика саласында да өзгерістер бар. Қазақстан мұнай экспортын қайта бағыттап, металл сынықтарын шетелге шығаруға тыйымды тағы жарты жылға ұзартты. Сонымен қатар жанармай мен сұйытылған газ экспортына қатысты шектеулер сақталуы мүмкін.

Білім саласында оқу жылы әдеттегіден ерте аяқталады. Соңғы қоңырау 23–24 мамырда өтеді. Ал 1-сыныпқа құжат қабылдау 27 мамыр мен 31 тамыз аралығында жүргізіледі. ҰБТ 10 мамырда басталып, 10 шілдеге дейін жалғасады.

Мамыр айында жаңа әуе рейстері іске қосылады. Алматы – Пусан бағыты қайта ашылып, Сеулге рейстер саны артады. Ал Еуропа бағытындағы билеттер қымбаттауы мүмкін.

Саяхаттауды жоспарлағандар үшін де жаңалық бар. Черногория 1 мамырдан 1 қазанға дейін қазақстандықтарға визасыз режим енгізеді. Ал қажылық маусымына байланысты Меккеге кіру талаптары күшейтілген.

Мамыр мерекелерге де бай. Биыл қазақстандықтар 14 күнге дейін демалады. 1, 7, 9 мамыр және Құрбан айт күндері қосымша демалыс беріледі. Алайда Астанада дәстүрлі әскери парад өтпейді, оның орнына концерттер мен мерекелік шаралар ұйымдастырылады.