2026 жылдың 19 шілдесінен бастап елімізде барлық банктер үшін ортақ бірыңғай QR-төлем жүйесі іске қосылуы тиіс. Осы уақыттан бастап қазақстандық қаржы ұйымдары банкаралық QR арқылы төлем жасау жүйесіне міндетті түрде қосылады, сондай-ақ телефон нөмірі арқылы ақша аудару мүмкіндігі де біріздендірілмек, -деп хабарлайды «Dalamedia» ақпараттық порталы.

Ұлттық банктің мәліметінше, тиісті заңнамаға енгізілген өзгерістер күшіне енгеннен кейін бөлшек төлемдермен жұмыс істейтін барлық банктер жаңа жүйеге қосылуға міндеттеледі. Олар белгіленген мерзімге дейін техникалық тұрғыда толық дайын болуы тиіс.

Қазіргі таңда 16 банк жүйеге қосылатынын растаған. Соның ішінде 12 банкте банкаралық ақша аудару қызметі іске қосылған. Ал QR-төлем жүйесі 7 банк пен «Қазпоштада» қолжетімді. Бір банк әзірге сынақ режимінде жұмыс істеп жатыр, қалған қаржы ұйымдары дайындық жұмыстарын жалғастыруда.

Ұлттық банк өкілдері жүйенің техникалық жағынан толық дайын екенін атап өтті. Дегенмен оның нақты іске қосылу қарқыны әр банктің өз ішкі әзірлігіне байланысты болмақ.

Сонымен қатар, реттеуші орган бірыңғай QR жүйесінің енгізілуі банктердің өзге цифрлық қызметтерін дамытуға шектеу қоймайтынын жеткізді. Керісінше, бұл қадам нарықтағы бәсекелестікті күшейтіп, клиенттерге жаңа мүмкіндіктер ұсынуы тиіс.

Айта кетейік, бұған дейін Мемлекет басшысы Қасым-Жомарт Тоқаев ірі банктердің бірыңғай QR жүйесіне қосылу процесін созбалаңға салуын сынға алған еді.