Қазақстанда алдағы жылдары авиация саласын дамытуға бағытталған ірі жобалар қолға алынбақ. Премьер-министр Олжас Бектеновтің төрағалығымен өткен кеңесте осы бағыттағы негізгі мәселелер талқыланды,-деп хабарлайды «Dalamedia» ақпараттық порталы.

Жиында азаматтық авиацияның қазіргі ахуалы сараланып, саладағы түйткілдер қозғалды. 2025 жылдың қорытындысы бойынша елімізде 20,8 миллион жолаушы тасымалданып, әуежайлар 31,8 миллион адамға қызмет көрсеткен. Жолаушылар ағыны әсіресе Астана мен Алматы әуежайларында жоғары болған.

Жоспарға сәйкес, 2028 жылға дейін 11 инфрақұрылымдық жоба жүзеге асырылады. Оның ішінде төрт жаңа әуежай салу, екі ұшу-қону жолағын іске қосу және бес қаладағы әуежай инфрақұрылымын жаңарту көзделген. Сонымен қатар биыл халықаралық бағыттар желісін кеңейтіп, 30 ел бойынша 135 маршрутқа жеткізу жоспарланып отыр.

Кеңесте отандық әуекомпанияларға авиаотын бағасының арзандатылғаны да айтылды. Қазіргі таңда еліміздегі әуежайларда бір тонна отын шамамен 800 долларды құрайды. Бұл шешім шетелдік әуе тасымалдаушылардың қызығушылығын арттырып, Қазақстанға жаңа компаниялардың келуіне жол ашқан.

Сондай-ақ KTZ Air Cargo жүк әуе компаниясының бағыттарын дамыту мәселесі назардан тыс қалмады. Бұл жоба елдің көлік жүйесінің тұрақтылығын күшейтуге бағытталған.

Премьер-министр шағын авиацияны дамытуда бірқатар кемшіліктер бар екенін атап өтті. Әсіресе, жеңіл әуе кемелерін сатып алу және әуекомпанияларды қаржыландыру тетіктерін жетілдіру қажеттігі айтылды.

Бұдан бөлек, саладағы цифрландыру жұмыстары да күн тәртібінде болды. Қазір Қазақстан 42 елмен көлік қатынасын орнатқан. Соңғы жылдары шетелдік рұқсат бланкілерінің саны үш есеге артқан. Осы үрдісті жеңілдету үшін құжаттарды беру жүйесі электронды форматқа көшірілген.

CarGoRuqsat жүйесі енгізіліп, Қытаймен шексіз алмасу жолға қойылған. Бүгінде рұқсат бланкілерінің 70 пайызы цифрландырылған. Сонымен қатар 2026 жылдың наурызында Түркі мемлекеттері ұйымы елдерімен e-Permit және халықаралық тасымалдарға арналған e-CMR пилоттық жобалары іске қосылды.

Үкімет басшысы бұл бағыттағы жұмысты жеделдетуді тапсырды. Оның айтуынша, транзиттік әлеует – Қазақстанның басты артықшылықтарының бірі. Сондықтан барлық жобаның орындалуы қатаң бақылауда болмақ.