Халықаралық деңгейдегі шахматшы, әлемдік рейтингте қыздар арасында үздік бестікке кіретін Бибісара Асаубаева Мемлекет басшысына ашық үндеу жолдады,-деп хабарлайды «Dalamedia» ақпараттық порталы.

Ол жуырда әлемдегі ең беделді жарыстардың бірі – Norway Chess турнирінде жеңіске жеткенін атап өтті. Шахматшының айтуынша, бұл жарысқа дайындық толығымен жеке қаражат пен ата-анасының қаржылай қолдауы есебінен жүргізілген. Сондай-ақ, командамен бірге жұмыс істеген секунданттар мен сарапшылардың еңбекақысы әлі толық төленбегенін жеткізді.

Бибісара Асаубаева өз үндеуінде Мемлекет басшысының спортшыларды «елдің алтын қоры» деп атайтынын еске салып, жоғары жетістіктердің артында үлкен еңбек пен табандылық жатқанын айтты.

Оның сөзінше, соңғы жылдары Спорт министрлігімен жұмыс істеу күрделене түскен. Сондай-ақ ол халықаралық жарыстардағы сыйақы көлеміне де тоқталды. Мәселен, шахматтан әлем чемпионы атанған спортшыға шамамен 2 мың доллар төленсе, Олимпиада жүлдегерлеріне берілетін сыйақы 250 мың долларға дейін жететінін айтты.

Шахматшы Қазақстанда әлем чемпионы атанған жалғыз әйел спортшы екенін де тілге тиек етті. Оның айтуынша, 2023 жылдан бастап әлем чемпиондығынан кейін Спорт министрлігі арқылы ай сайын шамамен 1 миллион теңге көлемінде жалақы алып келген. Алайда 2025 жылдан бастап бұл жалақы үш есеге қысқартылған.

Сонымен қатар, ол министрлік ұсынған қолдау тетіктері аясында бірнеше рет қаржылай көмек алуға өтініш бергенін жеткізді. Оның айтуынша, Спорт министрлігі басшылығы мен қамқоршылық кеңес бұл өтініштерді мақұлдағанымен, кейіннен қор тарапынан себепсіз кері қайтарылған жағдайлар болған.