Әйгілі қазақстандық шахматшы, гроссмейстер Бибісара Асаубаева кәсіби деңгейде жоғарғы нәтижеге жету үшін қомақты қаржы қажет екенін айтып, дайындық үшін қажетті шығын көлемін жария етті, – деп хабарлайды «Dalamedia» ақпараттық порталы Tengri Sport-қа сілтеме жасап.

Блиц бойынша үш дүркін әлем чемпионының сөзінше, ол жыл сайын жеке бапкерімен алты оқу-жаттығу жиынын өткізеді. Әр жиын 10 күнге созылады. Жеке жаттықтырушының бір күндік қызметі 1000 еуро тұрады. Бірақ бұған жол шығыны мен тұру ақысы кірмейді.

Осылайша, бір бапкердің өзіне ғана жылына шамамен 60 мың еуро немесе 35 миллион теңгеден астам қаражат жұмсалады.

Қазір шахматшының дайындығына 11 адамнан тұратын команда қатысады. Олардың қатарында негізгі жаттықтырушылар, спарринг-серіктестер және дебют, миттельшпиль, эндшпиль бойынша мамандар бар. Спортшының айтуынша, мұндай кешенді дайындық үміткерлер турниріне қатысу деңгейіне байланысты қажет.

Айта кетейік, Бибісара Асаубаева 28 наурыз бен 16 сәуір аралығында өтетін үміткерлер турнирінде бақ сынайды. Жарыс жеңімпазы классикалық шахматтан әлем чемпионы атағы үшін ойнау мүмкіндігіне ие болады. Қазіргі таңда бұл титул қытайлық шахматшы Цзюй Вэньцзюньның еншісінде.