Катар астанасы Дохада өткен әйелдер арасындағы блиц шахматтан әлем чемпионатында қазақстандық шахматшы Бибісара Асаубаева жеңіске жетті. Осылайша ол блиц шахматтан үш дүркін әлем чемпионы атанған тұңғыш қазақ қызы болды.

15 турға созылған жарыста 140 спортшы бақ сынады. Бибісара 11 ұпай жинап, жартылай финалда қытайлық Чжу Цзиньэрді 3:0 есебімен жеңді. Ал финалда украиналық, екі дүркін әлем чемпионы Анна Музычукты 2,5:1,5 есебімен ұтып, чемпиондық атақты иеленді.

Айта кетейік, ол бұған дейін 2021 және 2022 жылдары да әлем чемпионы атанған. Айтулы жеңістен кейін Мемлекет басшысы Қасым-Жомарт Тоқаев Бибісара Асаубаеваны құттықтап, ІІ дәрежелі «Барыс» орденімен марапаттады.