Алматы қаласында жүк тасымалына қатысты талаптардың сақталуын бақылау күшейтіліп, рейдтік шаралар тұрақты түрде жүргізілуде. Бұл жұмыстар «Таза Қазақстан» республикалық акциясы мен «Заң және тәртіп» қағидатын жүзеге асыру аясында қолға алынған, -деп хабарлайды «Dalamedia» ақпараттық порталы.

Тексеру кезінде абаттандыру ережелерін бұза отырып жүретін жүк көліктеріне ерекше назар аударылады. Атап айтқанда, тентсіз қозғалу, жүкті дұрыс бекітпеу, сондай-ақ жолға топырақ, құрылыс қалдықтары мен сусымалы материалдарды төгіп кету деректері анықталып отыр.

Мұндай заң бұзушылықтар қаланың санитарлық жағдайына кері әсер етіп қана қоймай, жол қозғалысы қауіпсіздігіне де қауіп төндіреді.

Жыл басынан бері қала аумағында абаттандыру талаптарын бұзудың 819 дерегі тіркеліп, тиісті шаралар қабылданған.

Рейдтік тексерістер мегаполистің барлық ауданында үздіксіз жүргізілуде. Мұндай жұмыстар алдағы уақытта да жалғасын таппақ.

Алматы қаласы полиция департаментінің Қоғамдық қауіпсіздік басқармасы бастығы Тимур Ноғайбаевтың айтуынша, жүк көліктерінің талаптарды сақтамай қозғалу фактілері жиі кездеседі. Оның сөзінше, мұндай әрекеттер жол жабынының ластануына әкеледі.

«Таза Қазақстан» акциясы мен «Заң және тәртіп» қағидаты аясында рейдтер тұрақты түрде жалғасады. Басты мақсат – тек құқық бұзушылықты анықтау емес, сонымен бірге қала тазалығына жауапкершілікпен қарау мәдениетін қалыптастыру», – деді ол.

Алматы қаласы полиция департаментінің баспасөз қызметі.