Енді көшеде қоқыс тастасаңыз жазаға тартыласыз, бұдан былай әкімдік те шара қолдана алады, – деп хабарлайды «DalaMedia» ақпараттық порталы.

Елімізде наурыз айынан бастап қоғамдық орындарды ластағандар мен абаттандыру талаптарын бұзғандарға тек полиция емес, әкімдік өкілдері де шара қолданады.

Экология және табиғи ресурстар министрлігінің басқарма басшысы Нұрлан Белқайыровтың айтуынша, абаттандыру ережесін сақтамаған азаматтарға әкімдік қызметкерлері бірден хаттама рәсімдеп, айыппұл сала алады. Ал көшеге қоқыс тастағандарға қатысты түпкілікті шешім сот арқылы қабылданады. Сонымен қатар бұл құқық барлық шенеунікке бірдей берілмейді. Қандай құрылымдық бөлімдер айналысатынын әкімдіктер өздері айқындайды. Негізінен бұл міндет тұрғын үй-коммуналдық шаруашылық және абаттандыру саласына жауапты басқармаларға жүктеледі.

Қолданыстағы талапқа сәйкес, ортақ пайдаланатын орындарды ластағандарға 43 мың теңгеден астам айыппұл немесе 40 сағат қоғамдық жұмыс қарастырылған. Ал ағаш сындыру, рұқсатсыз кесу және басқа да абаттандыру талаптарын бұзғандарға 86 500 теңге айыппұл белгіленген.