Денсаулық сақтау министрлігінің мәліметінше, ел аумағында стоматологиялық ұйымдарға бақылау күшейтілген. Тексеру мемлекеттік тапсырма негізінде Медициналық және фармацевтикалық бақылау комитетінің аумақтық департаменттері арқылы жүргізілуде.

Жалпы тексеріс тізіміне 622 клиника енгізілген. Бүгінге дейін соның 392-сі тексеруден өткен. Нәтижесінде 103 клиникада ешқандай заңбұзушылық анықталмаған.

Ал тексеру қорытындысы бойынша 174 стоматологиялық клиника қызметін тоқтатқан. Олардың 56-сы медициналық қызмет көрсетуге берілген лицензиясын өз еркімен қайтарған.

Кейбір жағдайларда бақылау барысында шұғыл шаралар қабылданып, жекелеген клиникалардың жұмысы 30-дан 90 күнге дейін уақытша тоқтатылған. Сондай-ақ бірқатар медициналық қызметкерлер 30 күнге дейін қызметінен шеттетілген.

Министрлік өкілдері тексеріс барысында медициналық көмек көрсету стандарттарының сақталуына, лицензиялық талаптардың орындалуына және мамандардың біліктілігіне баса мән беріліп отырғанын атап өтті.