Алматы әкімі Дархан Сатыбалды Жетісу ауданындағы көріктендіру жобаларымен танысты, — деп хабарлайды «Dalamedia» ақпараттық порталы

Дархан Сатыбалды Жансүгіров көшесін аралап, көріктендіру жобаларының жүзеге асырылу барысымен танысты. Әкім инфрақұрылымның жай-күйіне және өндірістік нысандардың жұмысына да зер салды.

Ол Боралдай көшесіндегі скверді аралады. Аталмыш аймақта балалар және спорт алаңдарын орналастыру, арт-нысандар орнату, сондай-ақ Сұлтан-Қарасу өзені арқылы жүргіншілер көпірін салу жоспарланған. Кездесу барысында тұрғындар аумақты көркейту бойынша өз ұсыныстарын білдірді.

Дархан Сатыбалды «Айс Мастер – Айс Крим компаниясы» ЖШС-не ат басын тіреді. Кәсіпорын өкілдері іргелес аумақты қалалық көріктендіру талаптарына сай ретке келтіруге дайын екендіктерін жеткізді. Сондай-ақ, қала басшысы Алматы қаласы Полиция департаменті қызметкерлеріне арналған жаңа спорт кешенінде болды.

Рысқұлов даңғылына дейін созылған аралау барысында жүргіншілер аймақтарының санитарлық жағдайы тексерілді.

Алматы әкімі бірыңғай дизайн-кодтың сақталуын қамтамасыз етуді, жобаларды жүзеге асыру мерзімін бақылауды, сондай-ақ қолайлы қалалық ортаны қалыптастыруда бизнеспен өзара іс-қимылды күшейтуді тапсырды.