Қазақстан Республикасы Қаржылық мониторинг агенттігі әл-Фараби атындағы Қазақ ұлттық университетімен бірлесіп, IT мамандарын, дерек талдаушыларды және жасанды интеллект саласының өкілдерін «AFM AI Hackathon 2026» атты ауқымды байқауға қатысуға шақырып отыр ,-деп хабарлайды «Dalamedia» ақпараттық порталы.

Іс-шара «Заң мен тәртіп» қағидатын жүзеге асыру аясында ұйымдастырылып, экономикалық және қаржылық қылмыстардың алдын алуға арналған цифрлық шешімдерді әзірлеуге бағытталған.

Хакатон 2026 жылғы 24–25 маусым күндері Алматы қаласындағы «Farabi Hub» алаңында өтеді.

Қатысушылар өз жобаларын үш негізгі бағыт бойынша ұсынады. Біріншісі – Digital Shadow, яғни ашық дереккөздер мен көлеңкелі интернет кеңістігін мониторингтеу. Екіншісі – AI Shield, деректер базасын қорғау мен киберқауіпсіздікті күшейтуге арналған жасанды интеллект шешімдері. Үшіншісі – AI Media Watch, әлеуметтік желілерде заңсыз ойын бизнесі мен қаржылық пирамидаларды анықтауға бағытталған жүйелер.

Ұйымдастырушылардың айтуынша, «AFM AI Hackathon» – технология мен қауіпсіздік тоғысқан, жас мамандардың идеясы нақты цифрлық шешімге айналатын бірегей алаң.

Байқауға қатысу www.qmahackaton.kz сайтында жүзеге асырылады. Команда құрамына үш адамнан артық қатысуға болмайды.