2025 жылғы 20 желтоқсанда Қазақстанда «Цифрландыру дәуіріндегі масс-медиа трансформациясы» тақырыбында ғылыми-практикалық дөңгелек үстел өтті. Аталмыш іс-шараны Бас редакторлар клубы, әл-Фараби атындағы Қазақ ұлттық университеті және «Alatau Aqparat» медиахолдингі бірлесіп ұйымдастырды.
Жиынға республикалық және өңірлік БАҚ басшылары, сала ардагерлері, ғалымдар мен медиа сарапшылар қатысып, отандық журналистиканың цифрлық ортадағы дамуы, жаңа форматтар, медиа этика және жасанды интеллекттің ақпарат кеңістігіне ықпалы талқыланды.
Кездесудің ашылуында Бас редакторлар клубының президенті Бибігүл Жексенбай цифрландыру кезеңінде ақпараттық жауапкершіліктің маңызын атап өтті. Ал ҚазҰУ ректоры Жансейіт Түймебаев журналистика саласында жасанды интеллектті қолданудың өзектілігіне тоқталып, университетте «LG AI MediaLab» зертханасының іске қосылғанын жеткізді.
Сондай-ақ басқосуда Мәжіліс депутаты Марат Бәшімов медиа этика мен ақпараттық қауіпсіздік мәселелерін көтерсе, ZTB media негізін қалаушы Марғұлан Тұрсынов цифрлық медианың жаңа форматтарға бейімделіп жатқанын айтты. Баспасөз журналистикасының болашағына қатысты бірқатар редакторлар оқырман мәдениетін сақтаудың маңызын атап өтті.
Сонымен қатар, сала өкілдері жасанды интеллект дәуіріндегі басқару мәдениеті, редакциялық жауапкершілік және ақпараттық ортадағы өзгерістер жөнінде пікір алмасты. Іс-шара барысында отандық журналистикаға еңбегі сіңген ардагерлер марапатталып, қатысушылар Farabi Hub инновациялық орталығының жұмысымен танысты.