Алматыдағы Әл-Фараби даңғылында болған жантүршігерлік жол апатынан көз жұмғандардың туыстары сотта айыпталушыға қатысты ұстанымдарын білдірді, — деп хабарлайды «Dalamedia» ақпараттық порталы.

Сот отырысында марқұм Томирис Қыдырбектің анасы онлайн байланыс арқылы сөз сөйлеп, айыпталушы Александр Пакқа ешқандай наразылығы жоқ екенін айтты. Оның сөзінше, сотталушы өз кінәсін толық мойындап, жасаған ісіне өкініш білдірген әрі келтірілген материалдық шығынды өтеген. Ал қайтыс болған қызын ешкім қайтара алмайтынын жеткізді.

Іс барысында апатқа дейін Александр Пакпен бірге дәмханада болған куәлардан да жауап алынды. Олардың бірі айыпталушыны тәртіпті әрі адал адам ретінде сипаттап, оның алкоголь ішкенін көрмегенін мәлімдеді.

Алайда сот материалдарында спирттік ішімдікке қатысты тапсырыс түбіртегі бар екені айтылды. Бұған қоса, сараптама қорытындысы бойынша айыпталушының қанынан этил спирті анықталған. Осыдан кейін куәгер ішімдік оның кетуінен кейін ішілуі мүмкін екенін жоққа шығармады.

Еске салайық, қайғылы жол-көлік оқиғасы 21 наурыз күні болған. Тергеу мәліметінше, Zeekr көлігінің жүргізушісі мас күйінде қарсы бағытқа шығып кетіп, Mercedes автокөлігімен соқтығысқан. Апат салдарынан үш адам оқиға орнында көз жұмған. Айыпталушы өз кінәсін мойындаған.