Алматыда Әл-Фараби даңғылында болған резонансты түнгі жол апатына қатысты сотқа дейінгі тергеу аяқталып, іс материалдары сот қарауына жіберілді, — деп хабарлайды «Dalamedia» ақпараттық порталы.

Марқұм 29 жастағы Mercedes көлігінің жүргізушісінің туыстарының заңды мүддесін қорғаушы адвокат Олег Чернов бұл деректі растады.

Алдын ала сот отырысы 28 мамыр күні сағат 15:00-де Алматы қаласының қылмыстық істер жөніндегі мамандандырылған ауданаралық сотында өтеді.

Еске салайық, 21 наурызға қараған түні Алматыда ауыр жол апаты болып, Mercedes жүргізушісі мен 20 және 22 жастағы екі жолаушы қыз қаза тапқан еді. Тергеу нұсқасына сәйкес, Zeekr жүргізушісі басқа көлікпен бірге көше жарысына қатысқан.

Кейін оның Zeekr көлігін басқарғаны және жеңіл дәрежеде мас күйде болғаны анықталды. Оқиғаға байланысты қылмыстық іс қозғалып, күдікті қамауға алынған. Тергеу барысында бірқатар заңбұзушылықтар анықталып, полиция департаментінің бірнеше жоғары лауазымды қызметкері қызметінен босатылды.

Қоғамда үлкен резонанс тудырған бұл іс бойынша Ішкі істер министрі Ержан Сәденов кінәлілер лауазымына қарамастан жауаптан жалтара алмайтынын мәлімдеген еді.