Ресей Федерациясы іздеу жариялаған Қазақстан азаматы Ақмола облысында қолға түсті. Ол бұған дейін Ресей аумағында мас күйінде көлік жүргізіп, жол-көлік оқиғасына себепкер болғаны үшін күдікке ілінген, – деп хабарлайды «Dalamedia» ақпараттық порталы.

Ақмола облысы Полиция департаментінің мәліметінше, өңірдің криминалдық полиция басқармасы көршілес мемлекеттерде де қылмыс жасап, іздеуде жүрген адамдарды анықтау бағытында жүйелі жұмыстар жүргізіп келеді.

Осындай шаралардың бірі кезінде Аршалы ауданында Ресейде іздеу жарияланған күдікті ұсталды. Ол 2024 жылы Ресей Федерациясының аумағында мас күйінде көлік жүргізіп, жол апатына себеп болған. Осыған байланысты қылмыстық іс қозғалған.

Алайда күдікті жауапкершіліктен жалтарып, Қазақстанға оралған. Содан бері оны Ресейдің Свердлов облысы ішкі істер органдары іздестіріп келген.

Қазіргі уақытта аталған оқиғаға қатысты тиісті тергеу әрекеттері жүргізіліп жатыр.