Атырауда төрт адамның қаза болуына байланысты қаралып жатқан қылмыстық іс бойынша сот отырысында айыпталушы Сұлтан Сәрсемәлиевтің әкесі куәлік берді,-деп хабарлайды «Dalamedia» ақпараттық порталы.

Сотта сөз алған Самиғұлла Сәрсемәлиев марқұмдарды жақсы танығанын айтып, олардың отбасыларымен ара-қатынасы бұрыннан үзілмегенін жеткізді. Оның сөзінше, тараптар арасында ешқандай даулы жағдай немесе араздық болмаған, керісінше жиі араласып тұрған.

Куәгер қаңтар айында ұлы мен келінінің ел аумағынан шыққанын естігенін айтып, олардың сапарын емделуге немесе басқа да себеппен байланысты болуы мүмкін деп ойлағанын жеткізді.

Сот барысында ол ұлын сабырлы, отбасына берілген азамат ретінде сипаттап, оның жаман әдеттерге әуес болмағанын атап өтті. Сондай-ақ, діни ағымдарға қатысы бар деген сұраққа нақты дерек келтіре алмайтынын айтты.

Әкесінің сөзін сот залында естіген Сұлтан Сәрсемәлиев көзіне жас алып, қатты толқыған. Бұл жағдайды оның адвокаты да растады.

Куәгер ретінде кейін айыпталушының анасы да тыңдалды. Ол сотта жауап беруден бас тартқанымен, тергеу барысында берген түсініктемелерін толық қуаттайтынын білдірді. Сот залынан шығар сәтте ол ұлына тіл қатып, немерелерін еске салып, қандай жағдай болса да әке ретінде жауапкершілігі сақталатынын айтты.

Айта кетейік, тергеу нұсқасы бойынша Сәрсемәлиев бұрынғы жұбайының туыстарын өлтірді деп айыпталып отыр. Ол кей эпизодтар бойынша кінәсін мойындағанымен, бір дерек бойынша қасақана кісі өлтіруді жоққа шығарып, оны абайсызда болған оқиға деп көрсеткен.