Астанада қаралып жатқан сот отырысында айыпталушы блогер Эльмира Төлегенова соңғы сөзін айтып, өз кінәсін толық мойындайтынын жеткізді. Ол соттан өзіне және жұбайына қатысты бас бостандығынан айырмайтын жаза қолдануды сұрады, — деп хабарлайды «Dalamedia» ақпараттық порталы.

Соттағы сөзінде Төлегенова бұл жағдай өздері үшін үлкен сабақ болғанын атап өтті. Айтуынша, болған оқиғадан кейін олар тиісті қорытынды жасап, заң бұзғандарына шынайы өкініш білдірген. Сонымен қатар ол соттан кеңесу бөлмесіне кетпей тұрып, процестік келісім жасауға мүмкіндік беруді өтінді.

Өз кезегінде прокурор сотталушылардың бұл ұстанымын нақтылап алуды сұрады. Ол келісім жасау үшін айыпталушылар кінәсін толық мойындауы қажет екенін еске салып, өтініш тек Төлегенова тарапынан ғана ма, әлде Ерболат Жанәбілов те осы келісімге ниетті ме деген мәселені көтерді.

Ал қорғаушы Гаухар Айтжанова барлық құқықтық талаптар мен оның салдары түсіндірілгенін айтты. Сондай-ақ ол мұндай келісімнің шарттары заң бойынша құпия сақталатынын жеткізді.

Судья істі қарау барысында бір сағаттық үзіліс жариялады.

Айта кетейік, блогерлер Ерболат Жанәбілов пен Эльмира Төлегеноваға қатысты сот процесі 2026 жылғы 13 наурызда Астанада басталған. Айыпталушылар істі жабық форматта қарауды сұрағанымен, сот бұл өтінішті қанағаттандырмаған. Дегенмен, сот отырысы кезінде бұқаралық ақпарат құралдарына фото және бейнетүсірілім жүргізуге тыйым салынған.

22 сәуірдегі отырыста мемлекеттік айыптаушы ерлі-зайыптыға 4 жыл бас бостандығынан айыру жазасын тағайындауды сұраған болатын.