Қаржы мониторинг агенттігі өзін маркетплейс ретінде таныстырған CVK қаржы пирамидасының қызметін тоқтатты. Ведомство дерегіне сәйкес, заңсыз схемаға еліміздің әр өңірінен шамамен 1,5 мың азамат тартылған, — деп хабарлайды «Dalamedia» ақпараттық порталы.

Ресми мәліметке қарағанда, ұйым қатысушыларға “инвестициялық дүкен пакеттерін” сатып алуды ұсынып, соның негізінде тұрақты табыс табуға болады деп уәде берген. Алайда тергеу барысында жеке кабинеттерде көрсетілген тауарлар мен жеткізілімдердің шын мәнінде болмағаны анықталған. Оның орнына қатысушыларға виртуалды сыйақылар есептеліп отырған.

Сонымен қатар жүйе реферальдық модель арқылы жұмыс істегені белгілі болды. Яғни жаңа адамдарды тартқан қатысушыларға ақшалай бонус пен түрлі бағалы сыйлықтар беріліп отырған.

ҚМА дерегінше, кең ауқымды жарнама мен өңірлердегі белсенді үгіт-насихат нәтижесінде жобаға шамамен 1,5 мың адам қосылған. Оны ілгерілету үшін жабық кездесулер, кеңселердің салтанатты ашылуы және көпшілікке арналған таныстырылымдар ұйымдастырылып, олар әлеуметтік желілерде кеңінен таратылған.

Тергеу материалдарына сәйкес, салымшылардың қаражаты криптовалюта платформалары арқылы шығарылып, кейіннен банктік шоттарға аударылып отырған.

Жедел іс-шаралар барысында жалпы көлемі 474 мың USDT криптоактивтеріне тыйым салынды. Қазіргі уақытта еліміздің 14 өңірінде сотқа дейінгі тергеу амалдары жалғасып жатыр.