Өскеменде дүкеннің ашылуы кезінде жаппай жиналуға себеп болған іс-шара ұйымдастырған кәсіпкер бес тәулікке қамауға алынды, –деп хабарлайды «Dalamedia» ақпараттық порталы.

Сот материалдарына сәйкес, 11 сәуір күні қаладағы «Башпай» дүкенінің ашылуы кезінде азамат Т қоғамдық тәртіп нормаларын бұза отырып, арнайы іс-шара өткізген. Ашылу барысында тауарлар жеңілдікпен сатылып, келушілерге тегін тамақ таратылған.

Соның салдарынан дүкен маңына адамдар көптеп жиналып, қысылыс пен шу туындаған. Кейін тәртіпсіздікке ұласқан жағдай қоғамдық қауіпсіздікке әсер еткені атап өтілді.

Шығыс Қазақстан облыстық соты кәсіпкерді “ұсақ бұзақылық” бабымен кінәлі деп танып, бес тәулікке әкімшілік қамау жазасын тағайындады. Сот шешімі әзірге заңды күшіне енген жоқ.

Айта кетейік, бұған дейін дәл осы дүкеннің ашылуында тегін аяқкиім алуға ұмтылғандар арасында қысылыс болып, адамдар бір-бірін таптап кете жаздағаны туралы хабарланған еді.