Алматыдағы №90 мамандандырылған мектеп-лицейінің оқушылары Түркияның Анталия қаласында өткен FEMO халықаралық математика олимпиадасында табысты өнер көрсетіп, 16 медаль иеленді,-деп хабарлайды «Dalamedia» ақпараттық порталы.

30 мамыр мен 1 маусым аралығында өткен білім додасына Қазақстан, Түркия, Ұлыбритания, АҚШ, Германия, Франция, Польша, Өзбекстан, Қырғызстан және өзге де елдерден келген дарынды оқушылар қатысты. Биыл олимпиадаға 6 мыңнан астам оқушы қатысып, олардың 570-і ғана финалдық кезеңге жолдама алды. Соның ішінде шамамен 200 оқушы жүлдегер атанды.

№90 мектеп-лицейінен қатысқан 16 оқушының барлығы жеңімпаздар мен жүлдегерлер қатарынан көрінді. Нәтижесінде жас математиктер 6 алтын, 3 күміс және 7 қола медаль жеңіп алып, мектеп пен ел абыройын халықаралық деңгейде тағы бір мәрте танытты. Бұл көрсеткіш білім ордасы үшін ғана емес, қазақстандық оқушылардың математикалық дайындығының жоғары деңгейін айғақтайтын жетістік болды.