Астанадағы мектептердің бірінде оқушылар арасында болған жанжалға қатысты полиция ресми түсініктеме берді. құзырлы орган мәліметінше, төбелеске қатысқан жасөспірімдер арнайы оқу орнына жіберілуі мүмкін, — деп хабарлайды «Dalamedia» ақпараттық порталы.

Оқиғаға байланысты әлеуметтік желілерде мектеп оқушыларының төбелесі түсірілген видео тараған. кадрлар астанадағы білім беру мекемелерінің бірінде болған жағдайды көрсетеді.

Сол кезде ата-аналар мектеп әкімшілігі жоғары сынып оқушыларының телефондарынан видеоны өшіруді талап еткенін айтқан. кейін білім басқармасы мектеп әкімшілігіне тәртіптік сөгіс жарияланғанын, ал төбелеске қатысқан оқушылардың ата-аналары жауапкершілікке тартылғанын хабарлады.

Астана қалалық полиция департаментінің дерегінше, кәмелетке толмағандар арасындағы бұл жанжал биыл қаңтар айында болған. осы факті бойынша қылмыстық іс қозғалған.

“Оқиғаға қатысқан барлық тұлға анықталды. қажетті процессуалдық әрекеттер жүргізілді. кәмелетке толмағандар қорғау құқығы бар куә ретінде танылды. қатысушылардың ата-аналары балаларды тәрбиелеу міндетін тиісінше орындамағаны үшін әкімшілік жауапкершілікке тартылды. білім беру мекемесіне қатысты ұсыныс енгізіліп, мектеп қызметкерлеріне тәртіптік жаза қолданылды. сонымен қатар профилактикалық кеңес өткізіліп, жасөспірімдер мектепішілік есепке алынды”, – делінген полиция хабарламасында.

Бұдан бөлек, жанжалға қатысқан оқушыларды девиантты мінез-құлқы бар балаларға арналған арнайы білім беру ұйымына жіберу мәселесі қарастырылып жатқаны айтылды.

“Тергеу жалғасуда. оның қорытындысы бойынша заңға сәйкес процессуалдық шешім қабылданады”, – деп нақтылады ведомство.