Қазақ тілі алғаш рет халықаралық Азиаттық-Тынық мұхиты лингвистикалық олимпиадасында (APLO-2026) жұмыс тілі ретінде бекітілді, ,-деп хабарлайды «Dalamedia» ақпараттық порталы.

Бұл зияткерлік додаға Қазақстан, Қытай, Жапония, Малайзия, Корея Республикасы, Сингапур және Таиландтан келген 300-ге жуық дарынды оқушы қатысты. Байқау талантты жастарды анықтап, оларды халықаралық лингвистикалық олимпиадаға даярлауға бағытталған беделді алаң саналады.

Қазақстан бұл олимпиадаға үшінші рет қатысып отыр. Биыл ел намысын 8 оқушы қорғады. Нәтижесінде қазақстандықтар 1 алтын, 1 күміс және 2 қола медаль жеңіп алып, жоғары дайындық деңгейін көрсетті. Сонымен қатар, 4 қатысушы Құрмет грамотасымен марапатталды.

Жеке есепте Азия елдері арасынан үздік нәтижелердің бірі тіркелді. Қазақстандық Шыңғыс Қарасаев 9-орын иеленді. Ал командалық есепте Қазақстан құрамасы 8-орынға тұрақтады.

Алтын медаль Орал қаласындағы жаратылыстану-математика бағытындағы Зияткерлік мектептің 12-сынып оқушысы Шыңғыс Қарасаевқа бұйырды. Күміс жүлдені Астана қаласындағы Нұра аудандық Зияткерлік мектептің 12-сынып оқушысы Әмірбек Азатбеков иеленді.

Қола медаль иегерлері қатарында Ақтау қаласындағы IT-лицейдің 11-сынып оқушысы Рамазан Бутантаев пен Қостанай облысы Жітіқара ауданындағы Абай атындағы мектеп-лицейдің 11-сынып оқушысы Кирилл Тұрғымбаев бар.