Жыл өткен сайын 25 мамыр бұрынғыдай қарапайым соңғы қоңырау күні емес, сән мен қымбат сыйлықтың жарысына айналып бара жатқандай. Бұған әлеуметтік желіде тарап жатқан видеолар дәлел, – деп хабарлайды «Dalamedia» ақпараттық порталы. Қазір мектеп бітіруші түлектер мұғалімдерге ғана емес, соңғы вальске шақыратын сыныптас қыздарға да үлкен гүл шоқтарын сыйлауды әдетке айналдырған.

Әлеуметтік желіде тіпті «қыздың қолында міндетті түрде гүл болуы керек» деген түсінік қалыптасып үлгерген. Кей бойжеткендер жақындары мен достарына алдын ала «гүл алып келіңдер» деп айтып қоятын көрінеді. Ал жігіттер қыздарды биге шақыру үшін көлемді әрі қымбат букеттерге тапсырыс беріп жатыр.

Гүл дүкендерінің айтуынша, дәл 25 мамыр қарсаңында тапсырыс бірнеше есе артады. Бағасы 30 мыңнан басталып, 300 мың теңгеге дейін жететін гүл шоқтарына сұраныс жоғары. Әсіресе үлкен көлемді моно букеттер мен ерекше безендірілген композициялар көп өтеді екен.

Бұл жағдай қоғамда қызу талқыланып жатыр. Бірі мұны әдемі дәстүр десе, енді бірі ата-ананың қалтасына ауыр салмақ түсіретін артық шығын екенін айтады. Әсіресе көпбалалы және жағдайы төмен отбасылар үшін мұндай бәсекеге ілесу оңай емес. Желіде тіпті «гүл алуға жағдайым жоқ» деп бітіру кешіне баруға ұялатын оқушылар туралы пікірлер де көбейген.