Еңбек және халықты әлеуметтік қорғау министрлігі елдегі кәсіпорындарда жалақының уақытылы төленуін бақылауды күшейтті. Қазіргі таңда республика бойынша 98 мың кәсіпорынға мониторинг жүргізіліп жатыр, — деп хабарлайды «Dalamedia» ақпараттық порталы.

Министр Асқарбек Ертаевтың айтуынша, жүргізілген талдау нәтижесінде жалақыны кешіктіру қаупі жоғары 2,3 мың кәсіпорын анықталған. Бұл ұйымдар министрліктің ерекше бақылауына алынған. Бұдан бөлек, тәуекел деңгейі орташа санатқа 3,2 мың кәсіпорын енгізілген.

Министрдің сөзінше, бақылау Еңбек тәуекелдерінің картасы арқылы жүзеге асырылады. Аталған жүйе еңбек заңнамасының бұзылу белгілерін анықтап, жұмыс берушілерге автоматты түрде ескерту жолдайды. Сондай-ақ ұжымдық шарттардың болуы, еңбек келісімдерінің рәсімделуі мен тіркелуі, жалақы және әлеуметтік төлемдердің уақытылы аударылуы да осы жүйе арқылы қадағаланады.

Ведомство мәліметінше, мониторинг нәтижелері кәсіпорындардағы ахуалды аудан деңгейіне дейін бақылауға мүмкіндік береді. Анықталған деректер әкімдіктерге, еңбек инспекцияларына және құқық қорғау органдарына жолданып отырады.

Еске салайық, бұған дейін Ұлттық статистика бюросы мемлекеттік басқару, қорғаныс және міндетті әлеуметтік қамсыздандыру саласындағы жалақы көлемі өңірлер арасында айтарлықтай айырмашылыққа ие екенін хабарлаған болатын. Статистикаға сәйкес, бұл саладағы ең жоғары орташа айлық жалақы Астана қаласында тіркеліп, 618 мың теңгені құраған. Ал ең төмен көрсеткіш Жамбыл облысында байқалып, орташа жалақы 301,9 мың теңге болған.