Қазақстанда мерекелер мен атаулы күндерге орай төленетін әлеуметтік көмектің ең төменгі мөлшері белгіленді, ,-деп хабарлайды «Dalamedia» ақпараттық порталы. Енді біржолғы төлем көлемі 2,5 айлық есептік көрсеткіштен кем болмауы тиіс.

Еңбек және халықты әлеуметтік қорғау министрлігі мәслихат шешімдері негізінде азаматтардың жекелеген санаттарына көрсетілетін әлеуметтік көмекті жетілдіру жұмыстарының аралық нәтижесін жариялады. Ведомство мәліметінше, қазір өңірлерде әлеуметтік көмектің көлемі мен түрлері әртүрлі бекітіледі. Бұл, негізінен, жергілікті бюджет мүмкіндіктеріне байланысты.

Осы айырмашылықтарды азайту үшін үкімет мерекелік және атаулы күндерге арналған біржолғы төлемдердің ең төменгі шегін бекітті. Сонымен қатар, табысы төмен азаматтарға көрсетілетін әлеуметтік көмектің мөлшері енді ең төменгі күнкөріс деңгейімен тікелей байланыстырылады.

Министрлік мәліметінше, күнкөріс деңгейі жыл сайын республикалық бюджет туралы заңмен бекітіледі. Соған сәйкес бұл көрсеткіш артқан жағдайда әлеуметтік көмек көлемі де автоматты түрде көбейіп отырады.

Әлеуметтік көмектің ашықтығын арттыру үшін оның түрлері, көлемі мен тағайындау шарттары кезең-кезеңімен цифрлық форматқа көшіріліп, «Е-Собес» ақпараттық жүйесіне енгізіліп жатыр.

Әлеуметтік көмек департаментінің директоры Айнұр Абдырахманованың айтуынша, мәслихат шешімдеріне өзгеріс енгізу жұмыстары аяқталуға жақын. Қала мен ауданның басым бөлігінде тиісті құжаттар қабылданған.

Сондай-ақ министр қалған өңірлерде де мәслихат шешімдерін қабылдау барысын тұрақты бақылауда ұстауды тапсырды.