Жамбыл облысындағы өндіріс орындарында аз уақыт ішінде орын алған екі оқыс оқиға салдарынан екі жұмысшы көз жұмды. Қайғылы жағдайлар ірі кәсіпорындарда тіркеліп, қазіргі уақытта тергеу жүргізіліп жатыр.

Алғашқы оқиға Жаңа Жамбыл фосфор зауытында болған. Алдын ала мәліметтерге сәйкес, пештен химиялық қоспа атқылап, үш жұмысшы түрлі деңгейде жарақат алған. Олардың бірі – 31 жастағы азамат ауыр күйік жарақатын алып, тыныс алу жолдары мен денесінің жартысына зақым келген. Зардап шеккен жұмысшы жансақтау бөліміне жатқызылғанымен, бірнеше күннен кейін қайтыс болды.

Оқиға кезінде жарақат алған тағы екі жұмысшыға медициналық көмек көрсетілген. Дәрігерлер олардың жағдайын тұрақты деп бағалап, өмірлеріне қауіп жоқ екенін хабарлады.

Екінші қайғылы жағдай осы өңірдегі «Қазфосфат» кәсіпорнында тіркелді. Онда зауытқа қызмет көрсететін мердігер компанияның жұмысшысын ауыр техника басып кеткен. Ауыр жарақат алған жүк көлігінің жүргізушісі оқиға орнында көз жұмды.

Аталған фактілер бойынша мемлекеттік еңбек инспекциясы жанынан арнайы комиссия құрылды. Мамандар екі жағдайды да жан-жақты тексеріп, тергеу нәтижесі бойынша материалдарды тиісті органдарға жолдайтын болады.

Жамбыл облысы еңбек инспекциясы департаментінің мәліметінше, комиссия құрамы бекітіліп, тергеп-тексеру жұмыстары белгіленген тәртіппен жүргізіліп жатыр.