31 мамыр – саяси қуғын-сүргін және ашаршылық құрбандарын еске алу күні. Бұл күн ХХ ғасырдағы зұлмат жылдары жазықсыз жапа шеккен миллиондаған адамның рухына тағзым етуге арналған, -деп хабарлайды «Dalamedia» ақпараттық порталы.

Қазақстан тарихындағы ең ауыр кезеңдердің бірі өткен ғасырдың 20-50 жылдарына тұспа-тұс келеді. Кеңестік билік тұсында «халық жауы» деген жаламен мыңдаған адам қуғындалып, сотталды, атылды немесе лагерьлерге жіберілді. Бұл нәубет қазақ қоғамына да ауыр соққы болып тиді.

Қуғын-сүргін жылдары елдің саяси және рухани өмірінде ерекше орны бар тұлғалар жаппай қудалауға ұшырады. Әлихан Бөкейхан, Ахмет Байтұрсынұлы, Мағжан Жұмабаев, Сәкен Сейфуллин, Ілияс Жансүгіров сынды ұлт зиялылары жазықсыз жазаға тартылды. Соның салдарынан халық өзінің талай білімді әрі көреген азаматтарынан айырылды.

Сол кезеңде Қазақстан аумағында Қарлаг, АЛЖИР, Степлаг секілді лагерьлер жұмыс істеді. Мыңдаған адам ауыр еңбекке жегіліп, адам төзгісіз жағдайда өмір сүрді. Сонымен қатар 1930-1940 жылдары түрлі этностар Қазақстанға күштеп көшіріліп, көптеген отбасының тағдыры өзгерді.

Қазақ халқы үшін ашаршылық та орны толмас қасірет болды. Миллиондаған адам қаза тауып, халық саны күрт азайды. Бұл оқиғалар ел тарихында терең із қалдырды.

Тәуелсіздік жылдары тарихи әділеттілікті қалпына келтіру бағытында маңызды жұмыстар атқарылды. 1993 жылы саяси қуғын-сүргін құрбандарын ақтау туралы заң қабылданды. Кейін архив құжаттарын зерттеу және жазықсыз жапа шеккендердің есімдерін жаңғырту жұмыстары жалғасын тапты.

Президент Қасым-Жомарт Тоқаев тарихи жадыны сақтау мен өткеннің ауыр сабақтарын ұмытпау маңызды екенін бірнеше рет атап өтті. Мемлекет басшысының айтуынша, жазықсыз құрбан болған азаматтардың тағдырын зерделеу – тарихи әділеттілікті қалпына келтірудің маңызды бөлігі.

31 мамыр – тек еске алу күні ғана емес, өткеннен тағылым алып, тарихи шындықты келер ұрпаққа жеткізудің де маңызды белгісі. Саяси қуғын-сүргін мен ашаршылық құрбандарының тағдыры халық жадында мәңгі сақталуға тиіс.