Қордай ауданында Мемлекет басшысы Қасым-Жомарт Тоқаевтың тапсырмасымен жүзеге асып жатқан «Таза Қазақстан» тұжырымдамасы аясында «Мөлдір бұлақ» экологиялық акциясы ұйымдастырылды,-деп хабарлайды «Dalamedia» ақпараттық порталы.

Шара Алға ауылдық округінде өтіп, оған аудан әкімі Бегзат Болатбеков, мекеме басшылары, ауыл ақсақалдары мен тұрғындар қатысты. Акция барысында ауыл маңындағы тау бөктерінде орналасқан бұлақ көзі тазартылып, қайта қалпына келтірілді.

Аудан әкімі табиғатты қорғау, қоршаған ортаны аялау және тазалық мәдениетін қалыптастыру ортақ міндет екенін атап өтті. Сондай-ақ бұлақ көздерін сақтау келер ұрпаққа табиғи мұраны жеткізудің маңызды бөлігі екенін айтты.

Іс-шара кезінде ақсақалдар батасын беріп, бұлақ көзін ашу рәсімі өтті. Сонымен қатар қатысушылар ағаш көшеттерін отырғызып, өңірдің көгалдандырылуына үлес қосты.