Мемлекет басшысы бұл күннің Наурызнама онкүндігінде айрықша орын алатынын айтып, қоғамдағы жаңару табиғаттың түлеген кезеңімен тұспа-тұс келіп отырғанын жеткізді. Оның айтуынша, мұндай үндестік әр азаматты ел игілігі жолында белсенді еңбек етуге жетелейді.

Президент елімізде «Таза Қазақстан» жалпыұлттық жобасының жаңа кезеңі басталғанын атап өтті. Осы бағытта «Мөлдір бұлақ» бастамасы қолға алынып, бұлақ көздерін ашу, ағаш отырғызу, өзен-көл жағалауларын, аулалар мен саябақтарды тазарту жұмыстары жалғасады.

Сондай-ақ Мемлекет басшысы Наурыз мейрамы тұсында қабылданған Жаңа Халық Конституциясында табиғатқа жанашырлықпен қарау ұлттық құндылық ретінде бекітілгенін еске салды. Ата заң ел бірлігінің тірегі әрі Тәуелсіздіктің берік негізі екенін атап өтті.

Президенттің сөзінше, «Таза Қазақстан» ұғымы тек қоршаған ортаны таза ұстаумен шектелмейді. Бұл – азаматтардың ниеті мен іс-әрекетінің тазалығын білдіретін кең ұғым. Ал мұндай көзқарас халықтың әл-ауқатын арттыруға негіз болады.

Қасым-Жомарт Тоқаев барша қазақстандықтарды Тазару күнімен құттықтап, табиғатты ұқыпты пайдалану мен саналы тұтыну мәдениеті қоғамда орнығып келе жатқанын айтты. Бұл үрдіс елдің жарқын болашағына жол ашатынын жеткізді.

Сөз соңында Президент жұртшылықты тазалық пен тәртіпті сақтауға белсене атсалысуға шақырып, бірлік болса, елдің еңсесі биіктей түсетінін атап өтті.