Биыл мал бағасының қымбаттауына байланысты құрбандық шалу әр отбасының жағдайына қарай жасалуы қажет, -деп хабарлайды «Dalamedia» ақпараттық порталы.

Дінтанушы Нұрлан Байжгітіұлының айтуынша, қазір қарызға батқан отбасыларға қосымша қарыз жүктемеген дұрыс. Ол мұндай жағдайда құрбандықпен қатар атқарылатын сауапты істердің де көп екенін атап өтті. Атап айтқанда, бауырмалдық таныту, кешірім жасау, мейірім көрсету, қамқор болу, ұлттық киім кию, тазалық пен тәртіп сақтау, сондай-ақ ағаш егу секілді амалдарды мысалға келтірді.

Имамның айтуынша, тауық, кептер, үйрек сияқты құстарды құрбандық ретінде шалу дұрыс емес. Құрбандық тек төрт түлік малдан — қой, ешкі, сиыр және түйеден шалынады.

Сондай-ақ ол сойылған мал етін бөлудің нақты тәртібі жоқ екенін, оны әр адамның өз қалауы шешетінін жеткізді. Дегенмен, ең дұрыс үлгі ретінде етті үшке бөліп: бір бөлігін өзіне қалдыру, бір бөлігін мұқтаждарға тарату, ал бір бөлігін қонақ күтуге арнау ұсынылатынын айтты.