Белгілі имам Нұрлан Байжігітұлы АҚШ астанасы Вашингтон қаласында өткен жыл сайынғы дәстүрлі дұға ету таңғы асына қатысты.

Бұл жолғы шара- аталған жиынның 74-ші рәсімі. Имамның айтуынша, алқалы басқосу әлемнің әр түкпірінен келген шамамен екі мыңға жуық танымал тұлғаны біріктірген. Шараға АҚШ президенті Дональд Трамп та қатысқан.

Нұрлан Байжігітұлы сапары жөнінде әлеуметтік желідегі парақшасында жазба жариялап, мұндай халықаралық кездесулердің маңызына тоқталды. Ол жастардың білім мен ғылымға ұмтылып, мәдениет пен өркениетті имандылық құндылықтармен ұштастыра білсе, олардың алдынан жаңа мүмкіндіктер ашылатынын атап өтті.

Айта кетейік, дұға ету таңғы асы - АҚШ-та жыл сайын ұйымдастырылатын, саясат, дін және қоғам өкілдері бас қосатын халықаралық деңгейдегі шара.