АҚШ Ресейге қарсы жаңа санкциялық шаралар пакетін әзірледі, бірақ оның енгізілетін мерзімі әлі белгісіз. Шетелдік БАҚ-тың хабарлауынша, Вашингтон Ресей мен Украина арасындағы қақтығысқа байланысты бейбіт келісімге қол жеткізу мүмкін болмаған жағдайда, Ресейдің энергетика секторына қысымды күшейтуді жоспарлап отыр. Мәскеу бұл санкцияларды заңсыз деп санайды.

Дереккөздердің мәліметінше, АҚШ бірнеше сценарий қарастырған. «Көлеңкелі флот» деп аталатын, мұнайды теңіз арқылы тасымалдауға қатысатын кемелер санкция тізіміне іліне алады. Сондай-ақ мұндай операцияларға қатысқан трейдерлерге де шектеу қойылуы мүмкін.

Сонымен қатар, Еуропалық одақ та Ресейге қарсы жаңа шектеулер дайындауда. Politico хабарлағандай, Брюссель 20-шы санкциялар пакетін әзірлеген. Құжаттың бекітілу мерзімі кейінге шегерілгенімен, Еурокомиссия оны кез келген күні жариялауы мүмкін.

Жаңа санкциялар пакеті 24 ақпанға дейін жариялануы ықтимал. Оған Ресейден металл импортын, оның ішінде иридий, родий, платина және мыс жеткізілімін шектеу мүмкіндігі де кіреді.