Қазақстанда жолдың үстінде намаз оқып, басқа адамдардың қозғалысына кедергі жасауға тыйым салынатыны айтылды. Мұндай әрекет тек заңға емес, діни қағидаларға да қайшы екені түсіндірілді, -деп хабарлайды «Dalamedia» ақпараттық порталы.

Қазіргі таңда, әсіресе Алматыда жұма күндері құлшылық орындарында адам көп жиналып, кейбірі ғимаратқа сыймағандықтан көшеге дейін шығып кететіні байқалады. Осыған байланысты діни өкілдер жұртты намаз уақытына алдын ала келіп, көлікті өзгелерге кедергі келтірмейтін жерге қоюға шақырды.

Алматы орталық мешітінің наиб имамы Бауыржан Көптілеуовтің айтуынша, адамға зиян келтіретін немесе қоғамдық тәртіпке кедергі болатын жағдайда құлшылықты дұрыс ұйымдастыру маңызды.

«Көлікпен болсын, өзі болсын жолды жауып тастап намаз оқығаннан гөрі, оны оқымаған дұрыс. Себебі парыздан бұрын адамға зиян келтірмеу қағидасы бар. Адамға зиян келсе, ол құлшылықтың мәні де бұзылады», – деді имам.

Сондай-ақ бұған дейін қоғамдық орындарда намаз оқу тәртібіне қатысты түрлі жағдайлар қоғам назарын аударған еді.